Urukiko Rwisumbuye rwa Nyarugenge rwategetse ko Urubanza rw’Ubujurire ruregwamo Umushumba wa Zeraphat Holy Church Bishop, Harerimana Jean Bosco n’umugore we Mukansengiyumva Jeanne, rukomereza mu muhezo.

Ni ubujurire bwari bwatanzwe n’Ubushinjacyaha nyuma yo kutanyurwa n’umwanzuro w’Urukiko rw’Ibanze rwa Kicukiro rwamurekuye by’agateganyo.

Bishop Harerimana n’umugore we bakurikiranyweho ibyaha birimo kwihesha ikintu cy’undi hakoreshejwe uburiganya, gukangisha gusebanya no gukwirakwiza amafoto y’imikoreshereze y’ibitsina.

Mu Rukiko rw’Ibanze rwa Kicukiro, Ubushinjacyaha bwari bwasabye urukiko ko urubanza rwakomereza mu muhezo kubera impamvu zishingiye ku miterere y’urubanza, ibivugwamo y’impamvu z’umutekano y’uwahohotewe kandi ni ko byagenze.

Urukiko rwaje gutegeka ko Bishop Harerimana Jean Bosco n’umugore we bafungurwa by’agateganyo bagakurikiranwa badafunzwe.

Ubushinjacyaha ntibwanyuzwe n’imikirize y’urubanza bujuririra Urukiko Rwisumbuye rwa Nyarugenge busaba ko yafungwa by’agateganyo.

Urukiko Rwisumbuye rwa Nyarugenge rwemeje ko urubanza rwa Bishop Harerimana rukomereza mu muhezo