Mu Karere ka Nyamasheke, habereye umuhango wo gushyikiriza impamyabumenyi abanyeshuri 2010 barangije amasomo yabo muri Kibogora Polytechnic, ishuri ry’Itorero rya Methodiste Libre aho Musenyeri mukuru w’iri torero yasabye abarangije kurangwa n’indangagaciro za Gikirisitu muri byose bazakora.
Uyu muhango wabaye kuwa 24 Mutarama 2025, witabiriwe n’abanyeshuri, ababyeyi, abarezi, n’abandi bayobozi batandukanye.
Umushumba Mukuru w’Itorero EMLR, Musenyeri Kayinamura Samuel, yibukije abanyeshuri barangije muri Kibogora Polytechnic ko ubumenyi bahakuye bugomba kujyanishwa n’indangagaciro za Gikristo, kugira ngo bizabafashe gutsinda neza ku isoko ry’umurimo.
Yagize ati “Nta kintu gishobora kugerwaho hatitawe ku gushimangira indangagaciro za Gikristo, imyitwarire myiza, n’imyumvire ikwiye Umunyarwanda”.
Musenyeri Kayinamura yavuze ko mu rwego rwo kwirinda kongera umubare w’abashomeri, bigisha amasomo akenewe cyane ku isoko ry’umurimo.
Iyi kaminuza yigisha amashami ane arimo uburezi, ubuforomo, iyobokamana n’ubukungu.
By’umwihariko, iyi Kaminuza imaze kugira uruhare rukomeye mu guteza imbere amasomo y’Iyobokamana (Theology), ifasha abahamagariwe umurimo w’Imana kubona ubumenyi bufatika bwo kuwukora neza kandi bufite ireme. Muri uyu mwaka, Kaminuza yasohoye abanyeshuri barenga 150 barangije mu ishami rya Theology.
Abarangije mu mashami ane yigishwa muri iyi Kaminuza ariyo uburezi, ubuforomo, Iyobokamana n’ubukungu, batangaje ko ubumenyi bavanye muri iyi kaminuza buzabafasha ku isoko ry’umurimo bakiteza imbere ndetse bagateza imbere igihugu.
Pastor Tuyizere Jean Baptiste , umwe mu barangije mu Ishami rya Theology muri Kibogora Polytechnic, yavuze ko kugira umuhamagaro w’Imana bidahagije ahubwo bisaba no kongeraho ubumenyi bwimbitse kugira ngo umuntu atange inyigisho zishingiye ku buhanga.Yashimiye byimazeyo iyi Kaminuza ku ruhare yagize mu kubaha ubumenyi bukenewe ngo bakore umurimo w’Imana mu buryo busobanutse kandi busabwa n’Ubuyobozi bw’Igihugu.
Yagize ati “Kuva twagera muri iyi kaminuza twungutse ibintu byinshi mu by’Iyobokamana, birimo kumenya ko Imana ikeneye impinduka zuzuye, ubwo n’izo mu mwuka, Ubugingo n’umubiri. Ikeneye kandi impinduka mu ndangagaciro ndetse no mu iterambere.”
Umuyobozi w’Akarere ka Nyamasheke, Mupenzi Narcisse, yashimye uruhare rw’iyi kaminuza mu guteza imbere abaturage b’aka karere n’igihugu, ndetse ashimira Itorero rya Eglise Methodiste Libre mu Rwanda EMLR, ku musanzu udasanzwe bagira mu burezi bw’u Rwanda.
Ati “Ntidushidikanya ko uruhare rwa Kibogora Polytechnic mu iterambere, rufite imizi mu ireme iri shuri ritanga”[…] “Turashimira iyi kaminuza kuko yagize uruhare kugira ngo haboneke abakora ivugabutumwa cyangwa abayobora imiryango ishingiye ku myemerere bize neza.”
Kaminuza ya Kibogora Polytechnic yashinzwe mu 2012, ije gukemura ikibazo cy’Abanyarwanda bajyaga gushakira impamyabumenyi mu Burundi na Repubulika ya Demukarasi ya Congo.
Kaminuza ya Kibogora Polytechnic imaze kuba ubukombe mu gutanaga umusanzu mu burezi kuko kuva yashingwa mu mwaka wa 2012 imaze gushyira ku isoko ry’umurimo abanyeshuri bagera ku 7,300.
Mu barangije mw’ishami rya Tewologiya harimo benshi mu bapasiteri basanzwe mu nshingano baturutse mu madini n’amatorero bitandukanye nka ADEPR, EMLR,ndetse na 20 babarizwa mw’itorero rya Zion Temple Celebration Center n’abandi baturutse ahatandukanye bose barimo bagenda buzuza ibisabwa n’urwego rw’igihugu rw’imiyoborere(RGB) ko umuntu wigisha ijambo ry’Imana agomba kuba yarabyize.
REBA VIDEO YUKO UYU MUHANGO WOSE WAGENZE:
