Kuwa Kane tariki ya 29 Gicurasi 2025, ku Itorero rya ADEPR Paruwasi ya Rwikubo mu karere ka Rwamagana habereye igikorwa cyo kwibuka Jenoside yakorewe Abatutsi mu 1994 ku nshuro ya 31, ku rwego rwa Paruwasi.
Mbere y’icyo gikorwa, Mukagihana Alphonsine warokotse Jenoside yashyikirijwe inzu yubakiwe n’iryo torero ku bufatanye n’inzego z’ibanze.
Igikorwa cyo kwibuka cyabanjirijwe n’urugendo rwo kwibuka ndetse no kunamira abazize Jenoside yakorewe Abatutsi mu 1994 bashyinguwe mu rwibutso rwa Rwamagana.
Umushumba w’Itorero rya ADEPR Paruwasi Rwikubo, Pasiteri Nsengiyumva Silver, mu ijambo yagejeje ku bitabiriye kiriya gikorwa cyabereye mu murenge wa Kigabiro, yagaragaje ibikorwa iyo paruwasi yakoze mu rwego rwo gufasha abaturage guhangana n’ingaruka za Jenoside yakorewe Abatutsi, birimo ibikorwa by’isanamitima no gufasha Abarokotse kwiyubaka no kugira imibereho myiza.
Yakomeje avuga ko mu bikorwa byakozwe uyu mwaka mu rwego rwo kwibuka Jenoside yakorewe Abatutsi mu 1994 ku nshuro ya 31 , abakirisito ba ADEPR Rwikubo bubakiye umuturage warokotse Jenoside yakorewe Abatutsi inzu .
Ni inzu ifite agaciro k’arenga Frw miliyoni 11.
Umuyobozi w’Akarere ka Rwamagana wungirije ushinzwe imibereho myiza y’abaturage, Umutoni Jeanne, yavuze ko nk’ubuyobozi bashima uruhare rwa ADEPR Rwikubo mu kubaka igihugu no guteza imbere imibereho myiza y’abaturage.
Ati: “Mu izina ry’ubuyobozi bw’Akarere nagira ngo mbashimire, nshimire Pasiteri Silver n’abakirisito kubera ibikorwa byiza bakora. Kwibuka turemera Mukagihana inzu uyu munsi we n’abana be bakabona aho baryama, ni igikorwa twashima. Kujya mu bikorwa byo kwibuka dufite n’ibikorwa nk’ibi mwakoze niko kwibuka twiyubaka, ibyo turabibashimira.”
Yakomeje agira ati: “Si ubwa mbere iyi Paruwasi muremera uwarokotse Jenoside yakorewe Abatutsi, kuko no bindi bihe mufasha abaturage mu bikorwa byo kubafasha kugira imibereho myiza. Ibyo bikorwa nk’ubuyobozi bw’akarere turabishimira iyi paruwasi ya ADEPR Rwikubo, mu izina ry’ubuyobozi bw’Akarere mbabwire ko tutazahwema kwifatanya namwe mu iterambere. Niba umuturage agomba kuba ku isonga, niko umukirisito na we agomba kuba ku isonga kugira ngo agire imibereho myiza.”
Umutoni kandi yasabye abaturage kwirinda Ingengabitekerezo ya Jenoside, ati: “kwirinda no kurwanya ingengabitekerezo ya Jenoside mubishyire ku mutima, muyirinde, muyirinde abana banyu nibwo muzaba mubaye abakirisito beza.”
ADEPR Rwikubo ni imwe mu maparuwasi 15 agize ururembo rwa Ngoma.
Ayo maparuwasi yose yakoze ibikorwa byo kwibuka abazize Jenoside yakorewe Abatutsi ku nshuro ya 31, ndetse biteganyijwe ko Tariki ya 12 Kamena 2025 mu karere ka Kirehe ariho hazabera igikorwa cyo kwibuka ku rwego rw’Ururembo rwa Ngoma, n’kuko byatangajwe n’umushumba w’Ururembo rwa Ngoma, Pasiteri Emmanuel Kananga.
