muryango w’Ivugabutumwa wa “A Light to the Nations” washinzwe n’Umuvugabutumwa Dr. Dana Morey w’Umunyamerika, ukaba uyoborwa na Dr. Ian Tumusiime muri Afurika, ugiye gutangiza ishuri ry’abayobozi b’amatorero rizatanga impamyabumenyi ya kaminuza.

Ku wa 5 Mata 2025, ku cyicaro cya A Light to the Nations Africa Ministries giherereye i Nyamata mu karere ka Bugesera, habereye amahugurwa y’abapasiteri n’abakozi b’Imana bo mu matorero atandukanye. Nyuma yayo, Dr. Ian Tumusiime, uhagarariye uyu muryango muri Afurika, yahaye itangazamakuru ikiganiro cyimbitse ku bikorwa byawo, intego zawo n’icyerekezo cy’ejo hazaza.

Uyu muryango, washinzwe n’umuvugabutumwa w’Umunyamerika Dr. Dana Morey, ukorera mu bihugu bitandukanye ku Isi, ugamije gushimangira ubumwe mu matorero, guteza imbere imiyoborere iboneye mu by’Imana, no gufasha abatishoboye.

Mu ntego eshatu z’uyu muryango harimo:

1. Gukora ibiterane binini by’ivugabutumwa (massive crusades).
2. Guhuza no guhugura abapasiteri n’abayobozi b’amatorero mu cyerekezo kimwe cyubakiye kuri Kristo.
3. Gutanga inkunga n’ubufasha ku batishoboye.

Dr. Tumusiime yavuze ko muri Uganda, ubwo bahakoreraga ibiterane mu turere twa Luweero na Mubende muri Werurwe 2025, bagiye basanga abashumba b’amatorero batagira ubumwe, bamwe bakaba badashobora no kwicarana, nyamara bose bavuga ko bakorera Imana imwe.

Yagize ati: “Mu by’ukuri ugiye kureba ikibitera, ibintu abantu bapfa usanga bidahari. Uwo ni umwitero Satani yitiza kugira ngo agonganishe abantu bubaka inzu imwe. Nje mbona Ubukristo ari umuryango umwe. Satani atuma badahuza kugira ngo umuryango ucike intege.
Ibintu byinshi tubyitirira Satani, ariko na we yitiza ibitekerezo byacu byanebwe, cyangwa byahisemo kwita ku bitagenda neza, bitatunogeye, tukaba ari byo twitaho.”

Yongeyeho umusanzu utangwa na A Light to the Nations kuri iyi ngingo, kandi agaragaza ko gahunda ya Ndi Umunyarwanda ibafasha mu guhuza abashumba bo mu matorero atandukanye i Mahanga agira ati: “Duhuza abapasiteri bo mu matorero atandukanye gukorera hamwe, aho kuryana”.

“Muri Afurika y’Iburasirazuba, u Rwanda ni cyo gihugu Umuporoso ashobora kwicarana n’Umuyisilamu, Umugatolika n’Umu-ADEPR, bakaganira nta kuryana. Nubwo batatumirana mu nsengero no mu misigiti, ariko muri gahunda ya Ndi Umunyarwanda twibagirwa iby’amadini. Ubwo ni ubudasa bw’Abanyarwanda tujyana mu mahanga.”

Ishuri rihugura abapasiteri: A Light to the Nations Academy

Mu rwego rwo gukemura ikibazo cy’ubumenyi buke mu bayobozi b’amatorero, ndetse no kuzuza ibisabwa na RGB ku bayobozi b’amadini mu Rwanda, A Light to the Nations yatangije ishuri mpuzamahanga ryiswe International ALN Academy.

Iri shuri rizamara imyaka itatu, rizatanga impamyabumenyi ya kaminuza (Bachelor’s Degree) ku bazarisorezamo. Dr. Tumusiime yasobanuye ko amasomo azatangwa ku bufatanye n’amashuri makuru arimo na Robert University. Iri shuri rizigisha abapasiteri kuba:
• Biblically Founded Leaders – bafite umusingi ukomeye mu Ijambo ry’Imana.
• Healthy Leaders – bafite ubuzima buzira umuze, ku mubiri, mu mutima no mu bitekerezo.
• Effective Leaders – bashoboye kuyobora no gutanga umusaruro.

Yagize ati: “Uwo muyobozi wese uzayobora muri A Light to the Nations agomba kuba azi Ijambo ry’Imana, afite ubuzima bwiza, ashobora kwiyitaho, azi kumenya neza ibyo atekereza, mu buryo bw’umubiri, mu mwuka, kandi atanga umusaruro mu byo akora.”

Yongeyeho ko ibyo RGB isaba byo kuba abashumba bagombwa kuba barasoje kaminuza bikwiriye, agira ati: “”Urwego rw’Igihugu rw’Imiyoborere mu Rwanda, RGB, rusaba ko abashumba b’amatorero baba ari abantu bafite ubumenyi buhagije. Iyo umuntu atoje/yigishije/atanze uburezi bubi, aba atanze uburozi. Umuyobozi ufite urujijo mu byo yigisha, ayobora abantu mu cyerekezo kibi. Umuntu udafite intego, abyara abantu badafite icyerekezo.”

Ibiterane binini n’uburyo bwihariye bwo gukurura abantu

A Light to the Nations ikoresha uburyo bwihariye mu gukurura abantu mu biterane byayo. Bukubiye mu gitekerezo bise “Gospel Sandwich” — ubutumwa bwiza buherekejwe n’impano zitandukanye nka moto zitangwa binyuze muri tombola, n’ibindi bikurura abantu.

Dr. Ian yasobanuye ko A Light to the Nations itegura ibiterane binini bihuza abantu benshi b’amatorero atandukanye. Ababirimo bafashwa gutombora, nyuma guhabwa Ubutumwa Bwiza (ibyo bigize Gospel Sandwich, ubutumwa+tombola), aho ubutumwa bw’Imana bushyirwa imbere, bugaherekezwa n’impano zitandukanye zituma abantu bashishikazwa no kuza.

Yagize ati: “Kugira ngo baze ari benshi dutegura icyatuma bishimira kuza muri Gospel Sandwich, umugati urimo inyama n’utundi tuntu. Ni ubutumwa burimo impano nyinshi. Ubutumwa ni umugati, ibirimo bindi nk’impano nka za moto n’ibindi, ni za nyanya n’utundi duteranyirije muri wa mugati wa Sandwich.”

Yatanze urugero ku bantu batandukanye batomboye, barimo abakoraga ku misarane, bagahabwa moto zabahinduriye ubuzima, nk’umudamu wo muri Uganda ufite abana barindwi wakoraga akazi ko gusukura imisarani, wamaze iminsi ibiri adatombora, ku munsi wa gatatu ari na wo wa nyuma agatombora moto ya nyuma, akaba yarayigurishije akubaka inzu, cyane ko umugabo wakamufashije yapfuye mu myaka 3 ishize.

Gukurikirana abakirijwe indwara

ALN ifasha abapasiteri gukurikirana neza abakira agakiza n’abakirira indwara mu biterane. Abo bakijijwe basabwa kuzuza imyirondoro mu bitabo bahawe mbere y’ibiterane, bityo bakabasha gukurikiranwa n’amatorero yabo nyuma y’ibiterane.

“Nubwo bose bataguma mu matorero nyuma, imbuto iba yarabibwe. Amatorero n’abapasiteri ni bo babakira, bakabaganiriza, bakabereka inzira yo gukomeza gukura mu kwizera.”

Uko bahuza amatorero n’imiyoborere ya Leta

Mu Rwanda, aho ubufatanye hagati ya Leta n’amadini burushaho kwitabwaho, Dr. Tumusiime yagaragaje ko umuryango wabo wigisha abapasiteri ko Leta atari umwanzi w’itorero, ahubwo ari inzego zashyizweho n’Imana.

Gahunda z’igihe kizaza

Mu rwego rwo gukomeza umurimo w’ivugabutumwa, A Light to the Nations izakomeza ibiterane binini muri Nyakanga n’Ukwakira 2025 muri Uganda, kandi muri Gicurasi mu Rwanda, ALN Academy izatangira kwakira abanyeshuri bashya.

Pastor Dr Ian Tumusiime wa A Light to the Nations yahishuye ko bagiye gutangiza ishuri rya tewolojiya